Copie Besteck om te maken een vergatt op de maniere als hier naer volcht

(1)

In den eersten sal den kiel lanck wesen achten seventich voeten, breet negen duymen, diepe zeven duymen, van twee stucken aen malcanderen gelast,

(2)

Den Voorsteven sal lanck wesen 10 voeten, ende vallens 5 voeten, bochts naer behooren, den achter steven lanck 10 voeten, ende zal vallen 3 voeten, zoo dick ende swaer als het werck zal vereyschen,

(3)

Dese vergatte sal wyt wesen 15 voeten, ende diepe 5 voeten, ende een halff, den overloop spannende 1/2 voet meer dan de voorgenoemde vergatte, vanden Capiteyn Leger Pieterssen, daer op zal den overloop wt wateren, den selfden overloop toegestreecken met goede drooge prusse delen, met zoo veel binden daer onder als het werck zal vereyschen Item aen elck bint 2 knie, wel vast door de huyt gesloten met een eycken Koker(?) van achter tot vooren van 2 voeten en halff hooge, drye duymen dicke, op den overloop zullen 2 schaer Stocken gelecht worden, binnen de coker om het coker stuck dat vooren staen zall langs te loopen ende voorts de coker met luycken boven toe gestreken,

(4)

Alle het Inhout sal dick wesen vier duymen vier quat ende wel verschieten,

(5)

De Plancken vande huyt sullen dick wesen 1 1/2 duym ende alzoo oock de weeghers van binnen,

(6)

Item twee berchoutten van achter tot vooren

(Seite 2)

breet 5 duymen ende dicke 4 duymen, om de vergatte te styven ende de Knien vande binden door te sluytten

(7)

Een Saedthout zoo lanck alst wercken mach over de wrangen breet elff duymen dicke 5 duymen daer de mast In zal comen te staen,

(8)

De wercken aen weder zyden vuyt streeckende met eenen dolboom daer op daer de dollen In zullen staen om bequamelyck met zestien ofte zeventhien riemen over elcke zyde te roeyen, ofte naer de besteders beliefte,

(9)

Item een pin galeysche wyse, met een voorcasteel daer het geschut In zal staen met een hutte ofte tente achter op,